日本少子化問題持續多年，實在已經唔係啲咩新聞，而且睇黎至少喺未來十幾二十年內都唔會有任何重大改變。因為據日本《ANN News》近日報導，有日本有近一半Z世代表示唔想生仔，而且理由並非因為「冇錢」咁簡單，顯示即使政府想鼓勵生育都唔係咁易。

據ANN News報導，日本入門網站 (Web Portal) 「Biglobe」早前針對Z世代 (即約1997年2012年出生，目前大約為10至26歲) 進入一個生育意向調查，結果發現當中有45.7%人都表示自己唔想生小朋友。如果再追問落去，就會發現唔想生小朋友嘅理由中，「冇錢」僅佔17.7%，「錢以外嘅原因」就佔42.1%。而所謂「錢以外嘅原因」就包括「冇信心養好小朋友」、「唔鍾意小朋友」、「唔想失去自由」等。

考慮到年齡，現今嘅Z世代大概會係未來20年嘅「生育主力」，而當中有一半人表示唔想生小朋友，就可以估計日本未來20年嘅生育率都唔太可能提升。報導亦指出，既然Z世代唔想生小朋友嘅主要原因並非無錢，日本政府目前嘅鼓勵生育政策 (例如生小友提供50萬Yen津貼) 相信亦唔會太有用，而且過往已經有唔少報導指出，嗰50萬Yen大約只可以支付孕婦嘅生產費用，即使作為金錢誘因都唔太足夠。

值得一提嘅係，唔少網民於報導下嘅留言都相當悲觀。有人表示如果知道自己嘅基因唔太好，生個小朋友出黎都只會害咗佢，咁就不如我自己辛苦就算；亦有人表示見到其他人結婚但唔生小朋友，無論於金錢、時間上都過得好好，對生小朋友嘅興趣就更低。

資料來源：ANN News