曾經有女人講過，「靚仔又會偷食、樣衰嘅又會偷食，咁點解我揀個靚仔嘅？」而下次你聽到有人咁講，你就可以咁答佢「因為有個靚仔老公，其實係對你嘅健康有所影響。而搵個唔靚嘅老公，仲有好多好處添呀！」

以上呢個說法，係真係有研究支撐。卻說2017年時，來自美國佛羅里達州立大學心理學系嘅Tania Reynolds帶領團隊完成咗一個關於女性節食嘅調查。佢哋嘅原意，係希望搵到女性節食嘅原因，會唔會同佢哋嘅社交環境，例如伴侶有關。於是佢哋就搵黎113對廿到尾嘅新婚夫婦，再搵黎一班大學生為呢班新婚夫婦嘅外表評分，並要求夫婦們回答一份關於節食、瘦身傾向嘅問卷，再將問卷答案同外貌作對比，睇下兩者之間有冇關係。

結果就發現，如果丈夫嘅外貌評分比太太嘅高，咁太太想節食、減肥嘅傾向 (壓力) 就會更大，特別係如果女性本身嘅外貌評分唔高，個節食傾向就更加大。背後嘅原因大概就係太太唔想被丈夫比下去，或者令外人覺得佢哋唔襯。由於節食呢家嘢本來就唔係開心事，同時節食壓力亦可能導致厭食或其他心理問題，所以就會影響太太嘅生活質素。

另一邊廂，如果太太嘅外貌評分較丈夫高，一來減輕咗太太嘅節食壓力，二來丈夫會傾向以更貼心、床上服務更週到、做更多家務等嘅方式去愛錫太太，進一步令太太更加開心。同時研究顯示，無論太太係靚過定醜過丈夫，對於丈夫嘅節食傾向都係毫無影響，亦即丈夫唔會因為太太靚過自己而有節食壓力。所以「美女配野獸」，可能先係最佳嘅配搭。

資料來源：Adopting a dyadic perspective to better understand the association between physical attractiveness and dieting motivations and behaviors、FSU