雖然話以貌取人好膚淺，但相信大家都會認同，一眾靚仔靚女於現實生活中，的確享有各式各樣的「福利」，甚至早有研究指出，外貌出眾嘅人，不論於事業或學業上，表現都會特別突出。但有趣嘅係，過去幾年嘅疫情似乎會消滅靚女們喺學業上獲得嘅優待，但對於靚仔就可能冇影響。

為咗研究外貌對於學業成績是否會產生「歧視性」影響，來自瑞典Lund大學嘅研究生 Adrian Mehic收集當地另一間大學前後五個年次，共307名工程系學生的外貌資料及成績。學生們上嘅課程內容完全一樣，唯一分別係其中兩個年次嘅學生，有部份課堂因為疫情關係而改為網上授課，而學校並無硬性規定學生一定要開Cam。Adrian相信「隔住個mon」或者會消除靚仔靚女們在學業上嘅優勢。另外佢亦搵黎74個受訪者去評定學生們的外貌吸引度。

首先，佢發現靚仔靚女們的確享有「外貌紅利」，喺管理學、經濟學等「非量化課程」之中，學生嘅外貌吸引度與最終成績成正比。有趣嘅係，佢亦發現於「可量化課程」，如數學、物理等，學生嘅外貌與成績並不相關。Adrian指出，「非量化課程」大多包含 group project 及 presentation，當中涉及與同學及教授嘅互動，而樣靚的確會帶來優勢；反觀數學、物理嘅評分大多黎至筆試，外表帶黎嘅優勢就變得唔明顯。

更有趣嘅係，當Adrian分析學生們改成線上授課後嘅成績，就發現靚女們於「非量化課程」的成績全面下跌，而靚仔們嘅成績就保持良好。換言之，隔住個mon之後，靚女們嘅外貌紅利就消失咗。

Adrian分析指出，靚女們於學業上得到嘅優勢，好可能係來自「歧視」，即大家因為佢係靚女、觀感更好而給予更高評分，所以隔咗個mon之後就會失去優勢；而靚仔們嘅優勢，就在於佢哋利用外表建立更好嘅社交能力以及自信，即使隔住個mon仍能在「非量化課程」中獲得好成績