喺呢個追求平權嘅年代，唔少人都話要打破性別刻板印象，例如「女人就一定要喺屋企湊仔」、「出街就一定係男人畀錢」之類。咁要打破刻板印象，首先就當然要搵出有咩刻板印象先，日本內閣府男女共同參畫局早前就做咗大型調查，搵出男女分別嘅十大性別刻板印象。

日本內閣府搵黎超過一萬名年齡介乎20至69歲嘅日本男女，分別選出「認同嘅性別刻板印象」，結果就發現男女嘅頭十名中，有7個係共同上榜，包括不論男女都分佔頭兩名嘅「女性應該有女性嘅感性 (即係「似返個女人」)」以及「男人應該做嘢養起頭家」，以及「女性是情緒化」、「育兒期間女人不應該擔任重要工作 (即係專心湊仔)」、「家務、育兒應由女性負責」、「即使兩公婆都要工作，男性都應該更著重事業而非家庭」以及「約會時應由男性請食飯」。反映日本男女雙方對於性別刻板印象嘅睇法其實好相似。

而男女頭十名中有分別嗰三樣，就係男性認為「男人唔應該喺人哋面前喊」、「男人就一定要成家立室」、「男人應該繼承家業」；而女性就認為「即使雙方都要工作，但小朋友有唔舒服時應該由媽媽照顧」、「男性比較適合領導」、「重要嘅事由應該男人去交涉」。簡而言之，日本男女似乎仍然保留「男主外女主內」嘅性別刻板印象。

但更值得一提嘅係，呢啲刻板印象嘅認同率與年齡增長係成反比，亦即係越年輕嘅人，對呢啲刻板印象嘅認同率就越低。例如「男人應該要賺錢養家一項」，60代男女認同比率為63.5%及55%，但20代男女認同比率就只有41.8%及38.3%；「雙方都要工作時，男性應該以事業為先」嘅60代男女認同比率分別為36.6%及30.5%，而20代男女認同比率就只有23.6%及15.2%。