自從疫情開始，大家嘅生活都有重大改變，例如有人會避免去人多擠逼嘅地方，會避免同人有身體接觸，甚至連正常約會以至約炮都受到限制。但正所謂越禁就越想做，一個美國調查就發現，喺呢個講求「社交距離」嘅年代，有超過五份一成年美國人竟然對「3P」以至「性愛派對」有更大興趣。

我哋曾經多次引用過嘅美國性學家Justin Lehmiller早前與一個美國情趣用品商合作，就疫情對性生活及習慣嘅影響訪問咗2000名美國成年人，其中有一部份就係問佢哋於疫情前後對於「3P」以及「性愛派對」嘅興趣有否變化。結果發現分別有23%及20%受訪者表示疫情後對「3P」及「性愛派對」更有興趣；29%及25%表示興趣不變；48%及55%人表示興趣更低。

其中數字又會因不同人口而有所不同。例如19-24歲階別中只有19%對「3P」更有興趣，但三字頭及四字頭人口嘅數字就係33%；33%男性對「多人運動」更有興趣，但女性就只有13%等。

就咁睇個數字，大家可能會覺得「唔係喎，一半人話更加無興趣喎！」，但根據另一個於疫情前進行嘅調查，就算開放如美國，其實都只係得18%男性及10%女性曾經試過3P、6%男性及5%女性試過參加性愛派對。換言之喺上面答「興趣更低」嘅人，好可能係本身都唔會參加嘅人；但嗰五份一話「更有興趣」嘅，就真係可能會踏出嘗試嘅第一步。各位又係屬於邊一邊呢？

資料來源：Sex And Psycgology