一個男人想吸引更多女人，其中一個最多人揀嘅方式就係練大隻，事實上練大隻唔單止能夠提升你嘅外表吸引力，過往亦有唔少研究指做運動會增強性欲、提升床上活動表現等好處，甚至令唔少女性對於大隻仔趨之若騖，希望搵個既能照顧下半生又能照顧下半身嘅好男人。不過！根據一個最新研究指，過度運動其實影響男性性欲及床上表現！

OK，首先要講明嘅係，運動的確係助提升性生活水平，除咗因為提升自己形象之外，運動會增加體內睪酮影響性欲及表現嘅內分泌，亦會提升心血管能力降低勃起障礙等問題。但一個發佈於「Medicine & Science in Sports & Excercise」嘅研究，喺訪問咗過千名成年男性嘅運動習慣、性欲評估之後，就發現只做短時間或中時間、輕度或中度運動嘅男性，比起做長時間重度運動嘅男性，更傾向擁有「正常」或「高」性欲，甚至建議臨床醫生面對男性性欲降低嘅問題時，要將佢嘅運動習慣都考慮埋入去。

雖然該研究無法斷定「長時間重度運動」令「性欲降低」之間嘅原因，但過往曾經有研究發現一種名為「運動男性性腺低下狀況 (exercise hypogonadal male condition)」嘅情況，簡單啲黎講就係運動令男性體內分泌嘅睪酮等荷爾蒙減少，從而令到性欲降低。

另外要留意嘅係，該研究亦冇提到究竟幾多、幾強嘅運動先算係「過度」，而又由於做「適量」運動又真係能夠提升性欲及床上表現，作為男士嘅大家似乎就要搵到屬於自己嘅平衡。

資料來源：Endurance Exercise Training and Male Sexual Libido