既然你會黎睇MenClub，相信你係一個身心健康嘅男人；而既然你係一個身心健康嘅男人，我肯定你有夜半無人「左青龍，右滑鼠」嘅經驗。不過根據「性保健界」品牌WOWTech做嘅一個調查，原來除咗「左青龍」，或者「右青龍」之外，有近五份一男人係「兩手青龍」！唔知佢用咩控制個滑鼠呢？

WOWTech原本就係出高級嘅女性自慰器如Womanizer、We-Vibe咁，但最新就推出咗男士用嘅空氣吸啜自慰器Arcwave，同時又為咗提倡「自我保健」嘅生活態度，所以就搵咗3000名來自英美澳加，以及香港、台灣等全球12個國家嘅男士做咗個關於自慰習慣嘅調查，當中有唔少頗為有趣嘅發現。

例如調查顯示受訪男士平均每年自慰154次，即係每個星期三次、或者隔一兩日就一次咁上下；至於自慰嘅地方，有56%受訪男士就會揀屋企嘅睡房，有30%人揀淋浴間，22%人揀廁所，但最驚人嘅係有1%人揀返緊工時自慰…咩工可以咁得閒？

資料來源：WOWTech

另外調查亦指有29%男士唔係「一雙手 可以不求人 頑強面對」，而係有用各種不同成人玩具嘅習慣，亦有61%人認為提升高潮快感係佢哋購買成人玩具嘅主要原因。

不過要講到最估唔到嘅數據，就係調查發現有29%男士係會平均地使用雙手黎自慰。調查冇講明究竟呢班人係左手攰就換右手、左手玩到悶就坐痺隻右手扮人哋隻手，定係同時用雙手，反正就唔係用死左青龍右滑鼠。睇黎呢班都係向周佰通學咗左右互搏嘅高手黎啦。