作為男人，無論你性欲有幾咁高漲、個人有幾咁大隻、對手有幾咁火辣，一次高峰之後都會進入所謂嘅「聖人模式」，必須要花啲時間回氣先可以再提槍上馬。但科學家其實一直都唔知道「聖人模式」真正嘅成因，以往有指高潮過後體內分泌大量泌乳素會係主要原因，但最新嘅研究就發現其實未必關事。

首先，「高潮過後體內分泌大量泌乳素」並唔係男人嘅專利——睇個名你都知呢種賀爾蒙嘅主要作用係刺激女性分泌乳汁——但女性就唔會出現「聖人模式」，甚至能夠「長做長有」；另一邊廂，泌乳素對於唔會分泌乳汁嘅男性有咩用，亦一路都係個謎。於是葡萄牙「Champalimaud未知研究中心」嘅研究員就希望於高潮過後同樣有「聖人模式」、泌乳素增多等現象嘅白老鼠身上搵出泌乳素嘅作用。

結果就發現，無論研究員增加或減少白老鼠體內嘅泌乳素，都對佢哋嘅回氣時間以至性欲毫無影響，回氣快嘅白老鼠繼續快、回氣慢嘅亦繼續慢。研究員指「我哋嘅研究證明泌乳素好有可能唔係聖人模式嘅成因」。

換言之，坊間一啲聲稱能夠透過減少泌乳素而增加性欲及回氣速度嘅藥物，好有可能都係冇任何作用。而男性「聖人模式」嘅真正成因就依然係個未知之謎。