一般黎講，大家都會覺得聖誕節係一個非常有「性趣」嘅節日，所以平安夜會有人祝你「出入平安」、如果你10月出世啲人就會覺得一定世伯伯母當件一定過咗個火辣聖誕。不過根據一個調查就發現，聖誕節、平安夜、以至聖誕前嘅三日，大家嘅性生活次數反而係會下降——但Boxing Day就真係「扑xing Day」啦！

來自美國史丹福大學嘅Laura Symul及其團隊，分析來自女仔紀錄生理期應用程式「Clue」收集到、50萬名來自英國、美國、法國、巴西等地女生嘅性生活數據，發現普遍黎講，假期時 (包括週末及節日假) 大家嘅性生活次數都會變多，唯獨係聖誕節就特別低。而且唔單止係聖誕當日，而係聖誕前三日都特別低。

分析指數字特別低嘅原因係，年輕、未婚或未有小朋友嘅家庭，聖誕節通常都會返咗老家陪父母，能夠與伴侶做愛嘅機會自然少咗；而結咗婚甚至已經有小朋友嘅女性，呢段時間就要忙住佈置間屋、整嘢食、寫聖誕卡諸如此類嘅麻煩事，同時仲要湊仔、做嘢，根本就冇時間冇心情做愛做的事。

情況直到聖誕過後，即係由Boxing Day開始先會好轉，直到1月1日 (由凌晨計起) 就會到達頂峰。換言之大家成日覺得「聖誕有性趣」，實際就係「聖誕後先有性趣」——不過相關調查就冇將今年因為「疫情關係」而冇街出、冇Party、冇人黎嘅情況計入去。