如果大家有留意上年嘅日本潮，大概都會知道珍珠奶茶——準確啲係啲「珍珠」大舉入侵日本，不單止珍珠奶茶店如雨後春筍一樣標出黎，甚至仲出現「珍珠拉麵」、「珍珠飯團」之類嘅奇妙產品。但一年過去，日本大量珍珠奶茶店結業、轉行，就連大型連鎖店都要轉賣「非珍珠」飲品維生。

據日本《WBS》嘅報導，年輕人已經開始「珍珠」感到厭倦，一來熱潮開始後飲得太多，二來係因為珍珠變得普遍後就唔「潮」，結果大量本身就係趕潮流嘅人就放棄再買。而有經濟評論員就指珍珠奶茶行業門檻低，入行易，退出亦易，於是店家覺得賣珍珠奶茶冇錢賺就會火速跳船。疫情初期時就已經有珍珠奶茶店改賣口罩，有鋪店兼賣炸雞，就連上年高調進入日本市場嘅貢茶都要不停推出冇珍珠嘅新飲品。日本全國「珍珠」入口量亦由上年後半年超過2500噸減到今年7月大約500噸，基本上回到2019年水平。

其實香港早於90年代都曾經出現「一街都係珍珠奶茶」嘅熱潮，直到後來出現「塑化劑事件」而減退，到近兩三年又再度興起。唔知過多十年日本又會唔會再興起珍珠奶茶熱呢？