唔知係咪韓國文化流行，反正依家啲女仔似乎對啲青靚白淨嘅後生仔特別有興趣，咁啲已經三頭、三中甚至三尾都未結婚嘅男人睇到當然就唔多開心。但唔緊要，因為據日本節目調查，日本女仔對於大叔非常有興趣！甚至連大佢哋廿歲佢哋都OK！

圖片：TBS グッとラック via Gamme.com.tw

日本TBS晨間電視訪問咗1600位2字頭到3字頭嘅女性，發現當中有25%人曾經對大佢20歲或以上嘅大叔吸引，更有14%嘅受訪女性曾經與大佢20歲以上嘅大叔交往。據節目指，女性之所以覺得大叔吸引唔係因為佢哋有錢或者咩，而係因為大叔們久唔久有啲傻嘢佢哋覺得好可愛。例如一位受訪者表示，公司派發嘅口罩明明有寫字，方便大家去分上下，但公司有個大叔同事依然會上下調轉戴，佢就覺得好「療癒」。

圖片：TBS グッとラック via Gamme.com.tw

但，你又唔好以為你係大叔就可以去日本大殺四方。節目另外訪問咗500位女性，發現女性們鍾意嘅係「乾淨、溫柔穩重及有趣」嘅大叔，而最討厭嘅係「臭、囉嗦同自以為是」嘅大叔。所以大叔唔一定識唔到女仔，但臭就唔得囉。