有人一聲認為「酒後會出現更親密行為」，所以黎緊會建議立法禁止全港所有領有酒牌嘅食肆酒吧賣酒，防止交叉感染咁話喎。嗱先唔好講如果我喺便利店買一大堆酒返屋企同朋友開Party點計，亦唔好理既然實際問題係「親密行為造成交叉感染」，咁點解唔直接禁做愛的事，淨係睇研究報告，究竟飲咗酒對你嘅性生活有咩影響呢？

大文豪莎士比亞曾經講過，「(Alcohol) provokes the desire but it takes away the performance」，換言之飲咗酒會你性欲高漲，但表現就會差啲。事實上莎翁呢個講法係啱嘅——不過要拆開兩句講。人體吸收酒精之後，不論男女都會會分泌更多罼酮，而睪酮就影響大家嘅性欲，所以少量酒精的確會令人性欲大增。但要注意，個重點係「少量」！幾「少量」？答案係大概每日一杯紅酒左右，數據啲講就即係血液中酒精含量為0.08%。再多嘅話，酒精對中樞神經嘅影響就會反過來降低性欲。換言之假如有關部門真係要制止「酒精導致親密行為」，實際上要做嘅唔係禁酒，係禁止啲人飲少少，要飲就飲多啲！

莎翁嘅後半句，就反映咗人體吸收過多酒精之後嘅反應。吸收過多酒精之後，人體會更難泵血去下體，亦會分泌更多「血管緊張素」進一步加大男性勃起難度。就算你下面好爭氣抬得起頭，你亦會因為酒精中毒而影響快感及高潮，甚至會變成一夜阿迷「齋傳唔射」。另一邊廂，女性身體同樣會被酒精影響而減少快感及更難達至高潮，更重要嘅係會令女性身體分泌減少。簡單啲講，就係飲得多，你想有親密行為都冇辦法，就算做到都係哂氣！

禁酒，大家都知冇可能完全禁得哂，反而會令到大家冇得開懷暢飲，變成偷偷地飲少少，變相更加激起親密行為。我唔知係咪因為有人個伴侶只有飲咗酒先肯同佢親密，所以先諗到條咁嘅橋，但照咁睇，禁酒就只會跌入汽水公司嘅圈套囉。