隨住Apple早前宣佈會利用Google嘅Gemini黎建立包括新版Siri嘅Apple Intelligence功能，早前更有報導指新版Siri可能會於本月推出嘅iOS 26.4中見街，大家或者都期望Apple能夠於AI領域上急起直追。不過據《Bloomberg》最新報導，新版Siri似乎出閘脫腳，新功能可能要分批推出，部份功能甚至可能要等到9月跟隨iOS 27先有。

2024年Apple公佈時，指新版Siri將能夠存取手機上嘅數據以及螢幕顯示內容，甚至能跨App操作以為用家完成某啲任務；而之前有報導指出新版Siri將於2月有Beta版、3月正式出街嘅iOS 26.4中推出。不過據《Bloomberg》Mark Gurman報導，近日Apple內部測試iOS 26.4時，發現新Siri仍然有三大問題。

第一係處理問題能力，據報目前嘅新Siri有時會未能處理用戶嘅查詢，有時亦要花長時間先可以作出回應。第二係穩定性問題，新Siri有時會提供不準確嘅回覆，有時又會打斷用戶嘅提問。第三就係可靠性問題，新Siri嘅背後理應係Google Gemini，但新Siri有時仍會走去依賴ChatGPT獲取資訊。而為咗解決呢啲問題，據報Apple已指示團隊要於iOS 26.5中進行更深入嘅測試，亦意味住部份功能可能要到iOS 26.5先會推出。

雖然聽起黎問題多多，但如果要正面啲諗的話，就係新Siri似乎真係做到發佈時嘅承諾，換言之只要將上面嘅地方再好好打磨，新Siri嘅表現就會有巨大進步。此外報導亦指Apple目前仲有個叫「Campo」嘅項目，目的係將Siri變成如ChatGPT、Gemini等嘅聊天機器人，預計會於iOS 27中推出。所以希望的確存在，就睇Apple能唔能夠成功兌現啦！

資料來源：Bloomberg