Sony電視雖然出名貴，但就憑住頂級嘅畫質及色彩顯示，成為唔少電視愛好者心者嘅首選。不過Sony電視業務黎緊就會有重大改革，事關日前佢哋宣佈會分拆電視業務，並將與中國電視品牌TCL成立合資公司，而合資公司未來亦會沿用「Sony」及「Bravia」品牌。換言之未來嘅Sony嘅電視，就唔再有純正嘅「日本血統」啦。

Sony於20日發出公告，表示已與TCL簽署「於家庭娛樂範疇的戰略合作備忘錄」，具體詳情就係兩間公司確認有意成立合資公司，以繼續經營Sony嘅家庭娛樂事業。新公司將由TCL掌握51%股權，Sony則佔49%，並會負責於全球經營Sony嘅電視及家庭音響業務，由產品開發、銷售、運送以至售後服務都會由新公司處理。

公告指新公司「將會充分利用Sony多年來累積的高品質影像和音訊技術、品牌價值和包括供應鏈管理在內的營運專長」、「同時結合TCL的先進顯示技術、全球規模優勢、產業佈局、端到端成本效益和垂直供應鏈實力」以推動業務發展。

Sony預計會於今年3月底前與TCL簽署有法律效力嘅協議文件，隔後則會完成監管部門批准等其他流程，預計新公司最終會於明年4月開始營運。

圖片：Sony

對消費者而言，呢個消息可能係好壞參半。事關TCL電視出咗名性價比極高，所以由佢哋黎經營Sony及Bravia品牌，就好可能意味住未來嘅Sony電視售價將會下調。但另一方面，以往大家之所以會一邊鬧「索尼罪大滔天」一邊買佢哋嘅產品，就係在於佢哋嘅日本品牌地位，以及相信Sony嘅品質一定對得起個價錢。依家變成由中國品牌主導，大家自然就會擔心未來產品品質下降。

講到尾，市場接唔接受今次合拚，相信都要等到2027年新公司開始營運嘅表現先有定案。如果真係能做到「TCL嘅價錢，Bravia嘅味道」，我諗無人會抗拒嘅。

資料來源：Sony