Instagram嘅內容推薦演算法一直係個謎：你唔小心睇咗條擠黑頭嘅片，然後成個Reels都係擠黑頭片；到你真係想搵某啲嘢黎睇時，佢又唔知點解碌極都無。不過呢個情況於不久嘅將來就會有所改變，事關Meta宣佈將早前測試嘅「Your Algorithm」（你的演算法）推廣至所有英文版用家，相信其他語言亦會好快跟上，到時大家就可以掌握Reels上嘅內容啦。

「Your Algorithm」嘅實際用法其實好簡單：於Reels頁面嘅右上角會多咗個設定掣，撳入去之後佢就會先顯示（佢覺得）你近期有興趣嘅內容主題，用家可以從中選擇真正有興趣嘅，又或者自行加入主題，咁往後睇Reels時就會有更多相關內容出現。而下方亦有一個「你想看更少」嘅欄目，用家可以自行填寫不感興趣或者想跳過嘅主題，咁Reels就會減少推薦相關內容。另外用家亦可以選取三個主題建立「我的2026年演算法」，然後發成Story。

而據外媒記者實測，「Your Algorithm」嘅效果係立竿見影，一設定好就已經會改變Reels嘅推薦內容。同時記者亦發現無辦法將「廣告」列為「你想看更少」嘅主題之一，但「贊助內容」就可以。另外「AI」亦可以成為「你想看更少」嘅主題之一，但記者就猜測佢只會篩走「關於AI」嘅影片，而非「AI製作」嘅影片。

資料來源：Engadget、Instagram