依家幾乎家家戶戶屋企都有部Switch、再加上手機遊戲越見流行，睇黎整個遊戲市場係一路擴張。不過對Sony、Microsoft及任天堂等傳統主機開發商而言，主機市場嘅整體銷售數字其實多年黎都無咩大改變。而近日前Sony互動娛樂（SIE-A）嘅CEO Shawn Layden就呼籲三大廠要參考多年前嘅「錄影帶戰爭」，應該要整合成一個「格式聯盟」，令所有遊戲都能於所有主機上運行，主機銷售數字先有望突破。

話說Shawn Layden早前登上「Pause for Thought」及「Naomi Kyle」嘅YouTube節目，期間就提到多年來主機市場其實有一個「上限」。「我哋成日話遊戲業係一個2500億美金市場、有幾千萬玩家，但其實呢個計法係將玩Wordle、Candy Crush嘅人都計埋入去。如果你淨係睇主機銷售數字，任何特定世代的遊戲主機銷售量，上限都係2.5億部左右。唯一一次去到3億部左右係因為有Wii，而大家覺得買Wii同Wii Fit返去就可以減肥。但呢個係例外，其他時間依然係無增長。」

至於點樣打破呢個「2.5億部」嘅上限？Shawn Layden就建議三大廠參考當年嘅「錄影帶戰爭」。話說當年錄影帶其實有唔共通嘅兩個格式，一個係Sony嘅Betamax，另一個係JVC嘅VHS，最終由VHS勝出。Shawn Layden認為VHS勝出嘅關鍵係JVC將生產權下放，令VHS錄影帶以及錄影機能夠快速普及。「啲人唔明同鄰居用同款機有幾重要。你可以唔同品牌嘅電視，無咩所謂，但當你鄰居揀咗VHS，而你想借佢盒帶黎睇，但你自己用緊Betamax……當時市場就係咁圍繞VHS建立出黎。」

圖片：Wikicommon

Shawn Layden補充指，VHS之後嘅CD、DVD、Blu-ray其實都係用樣嘅方法成為主流，而佢認為遊戲界亦應該要從中學習，建立一個共通嘅遊戲格式。換言之，佢認為以後遊戲唔應該有所謂嘅平台分別，任何一隻Game碟或卡放入任何一個品牌嘅主機內都可以運行遊玩zd1而且三大廠仲要下放主機生產權，容許其他廠生產嘅主機都可以運行該格式嘅遊戲。到時主機之間嘅分別就會在於功能性，正如Shawn Layden提到：「大家都可以播Blu-ray，但B&O嘅Blu-ray機會比Sanyo嘅貴，因為佢有唔同嘅附帶功能。」

但即使係Shawn Layden自己都認為呢重完全消除「平台限定」嘅可能性唔高：「我唔認為每隻Game都應該要平台限定，但我亦同意擁有強大獨家作品，會為Sony及任天堂——Microsoft更傾向讓Xbox『無處不在』——帶來巨大價值。如果瑪利奧出現喺PS上面，世界末日啦下話？」

資料來源：IGN