坊間有云「抖音一響父母白養」，意指年輕人長期睇「抖音」之類嘅短片後，就會變得行為脫序、價值觀偏差；而外國亦有所謂「Brain Rot」（腦腐）黎形容短片潮流帶來嘅精神及智力退化現象。而根據一個最新研究，其實上述說法都真有其事：長期重度觀看短片唔單止會降低認知及衝動控制能力，仲會增加抑鬱、焦慮、壓力及孤獨嘅症狀。睇黎真係百害而無一利喎。

圖片：ImageFX

話說來自澳洲昆士蘭Griffith大學應用心理學及犯罪學與刑事司法系嘅團隊，早前公佈咗一份研究報告，整合咗過去71份、總計近10萬名受訪者嘅短片影響研究，結果就發現短片嘅重度觀看行為與認知力之間存在負關係，即係睇得越多認知力就越低，而於「注意力時長」及「衝動控制」層面嘅影響就特別大。同時佢哋亦發現重度觀看影片與抑鬱、焦慮、壓力及孤獨嘅症狀有正相關，亦即睇得越多症狀就越明顯。

而據《CNN》報導，10月時有另一團隊整合咗另外嘅十四個研究，同樣發現重度觀看短片會影響注意力時長之外，更發現會降低學術成績。雖然上述研究仍然以相關性為主，未到可以百分百證明因果，但不同研究之間嘅結論大致一致，至少可以肯定「長時間觀看短片」同「認知力低下」之間，確實有唔少關連。

圖片：ImageFX

但有學者亦提醒唔好過份妖魔化短片。美國Vanderbilt大學嘅神經心理學家James Jackson指出，過往電子遊戲以至貓王演唱會都曾受過類似批評，所以即使佢相信對於短片嘅擔憂大多有理有據，佢依然持保留態度。同時佢亦指出當前嘅研究顯示，大量接觸短影片似乎普遍對大腦產生有害影響。但箇中細節——例如邊啲人最易受影響、影響是否持久，以及具體邊啲機制導致傷害——仍需更多研究來解析。

資料來源：CNN、Feeds, feelings, and focus: A systematic review and meta-analysis examining the cognitive and mental health correlates of short-form video use