Google開發嘅人工智能Gemini早前發佈3.0 Pro版本，無論於標榜功能、實際使用以至專業評分等都大幅拋離包括ChatGPT等市面上其他AI。事後OpenAI CEO Sam Altman曾於社交媒體上發文指Gemini 3.0 Pro「看起來不錯」，似乎仍然定過抬油。不過近日就有報導指其實佢深感威脅，對公司發放「紅色警誡」，務求於最短時間內重新成為AI皇者。

據《Wall Street Journal》及《The Information》報導，Sam Altman於美國時間本週一向OpenAI內部發出公告，催促員工盡快提升ChatGPT嘅功能，為此更會暫時放下目前正在開發嘅其他AI功能，包括廣告、購物、健康助理，以及個人助理Pulse等等，將資源集中於ChatGPT之上。據報Sam Altman希望ChatGPT能夠變得更快、更可靠、更個人化，而且能回答更多問題。而負責相關工作嘅人黎緊更要每日開會匯報開發進度，公司亦會鼓勵員工暫時性轉到另一部門工作，以加快開發進度。

有報導分析指出，OpenAI今次發出「紅色警誡」，意味住佢哋都認為Google Gemini已經追上甚至超越ChatGPT嘅發展。特別係OpenAI其實一直都未搵到真正營利嘅方法，所以維持領頭羊位置就變得非常重要，甚至有可能影響OpenAI本身嘅存亡。

有趣嘅係，據報當初ChatGPT發佈後，Google就曾經發放類似嘅「紅色警誡」，以期追上ChatGPT。依家Google追到啦，又到OpenAI自己發「紅色警誡」。樂觀啲黎睇，兩者嘅競爭應該會大幅加快AI發展進程，大家未來應該會有更好嘅AI可以用。

資料來源：The Verge