記得早排有張外國Meme圖，話大家想要嘅係AI幫手返工、做家務，人類就可以去畫畫寫歌；點知依家係AI去畫畫、寫歌，人類就可能連份工都無埋，都真係幾諷刺。不過黎到今晚今日，就終於有AI技術係幫大家處理一啲嫌惡性工作：有咗Kohler推出嘅呢個「AI馬桶鏡頭」Dekoda，以後大家去完廁所就唔使自己回頭檢查「成果」啦！

顧明思義，「Dekoda」就係一個有AI輔助、夾喺馬桶邊緣嘅鏡頭，不過佢就唔係向上拍，而係向下影住你嘅「排出物」。Kohler指出Dekoda結合AI後可以收集「排便頻率、形狀、硬度、水分」，甚至可以偵測到排出物中是否有血；而將呢啲數據傳輸到Kohler Health App之後，更可以整理出幾時應該補充水份、飲食習慣點樣影響排便、係咪要去睇醫生作更詳盡檢查等健康建議。簡單黎講就即係有人喺你每次去完廁所探個頭落去望一眼，然後話你知質量合唔合格，有無問題。

Dekoda更有一個另外安裝嘅指紋控制器，方便辨認係邊個家庭成員去廁所。另外Kohler提醒如果馬桶本身顏色太暗，有可能因為燈光不足而未能檢測你嘅便便。

睇到呢到，你可能會覺得呢類產品「有都唔錯」，但當你睇埋個價錢後可能就有另外嘅諗法：Dekoda本身要價599美金，即約HK$4,650，而且仲要訂閱埋Kohler Health App先可以用，單人另加6.99美金一個月或70美金一年、家庭方案最多五人使用就要12.99一個月或130美金一年。與之相比，去完廁所耷低頭望兩眼嘅成本應該係零？咁睇黎真係要好著重健康嘅人先會考慮啦。

資料來源：Kohler、The Verge