中國手機品牌榮耀（Honor）近日喺Magic8系列發布會上，首度展示一款全新概念手機「Robot Phone」。其最大特色係內置一個由AI驅動嘅雲台相機，從機背彈出後可以朝多個方向拍攝及錄影，仲可以同用家互動。

從官方嘅CGI預告片可見，呢款雲台相機採用折疊式設計，平時收納在機背上方，藏喺一塊可橫向滑動嘅玻璃蓋下面，驟眼睇睇一般手機無分別。但當開啟相機時，鏡頭就會從機身中自動彈出展開，並且能夠作出旋轉及翻轉的動作，朝向多個方向拍攝或錄影，有啲類似DJI嘅雲台相機Osmo Pocket。

除此之外，官方更宣稱Robot Phone將會搭載超強AI，猶如擁有一個能洞悉萬物嘅大腦，與用戶共享生活點滴，成為一位情感伴侶。而官方亦喺預告片中將鏡頭擬人化，例如會對美麗嘅景色作出反應、為用戶提供穿搭建議、自動構圖取景、甚至可以氹小朋友開心...。

不過，目前一切都只係概念階段，尚未公布具體規格，實際上能否做到片中嘅效果仍然係未知之數。HONOR表示將於明年3月舉行嘅世界行動通訊大會（MWC 2026）揭曉更多細節，唔知到時會唔會有真機展出呢？大家拭目以待吧！