《GTA 6》既係玩家期待已久嘅大作，又係其他遊戲是否、能否加價嘅風向標，有關遊戲嘅風吹草自然特別引人注意。而近日一個口碑參差嘅網上爆料者，就爆出《GTA 6》英國版嘅售價，同時仲話《GTA 6》可能要再次延期，到9月先見街，引起網民熱議。但爆料者好快將帖文下架，令傳言嘅可信性進一步降低。

圖片：Reddit

據《Screenrant》報導，於遊戲爆料界口碑參差嘅「Millie A」上週於X上發文，簡短地提供咗有關《GTA 6》嘅幾個情報。當中包括《GTA 6》將會推出三個版本，分別為基本版、可優先遊玩GTA Online嘅豪華版（Deluxe）及最早可以玩GTA Online嘅高級版（Premium）。同時「Millie A」亦提供三個版本嘅售錢，分別為69.99、89.99及109.99英鎊，換成美金就即係79.99、99.99以及119.99。換言之《GTA 6》真係會打破目前遊戲嘅70美金慣例售價。

同時「Millie A」亦指《GTA 6》雖然亦以明年5月推出為目標，但內部正討論是否需要再次延期到明年9月。

值得一提嘅係，「Millie A」作為一個爆料者嘅口碑唔算太好，特別係早年佢提供過一堆關於《Hogwarts Legacy》、最終證實不準確嘅情報，令佢嘅可信度備受質疑，「Reddit」討論區上甚至有人稱佢為「假爆料者」。同時上述嘅帖文目前亦已經被刪，進一步令人懷疑消息嘅真確性。

資料來源：Reddit、Screenrant