單憑當年幾多阿叔係為咗上鹹網先去用電腦，你就知道鹹濕素來係推動大家接觸、使用新科技嘅一個重大動力。而最新嘅相關例子就發生於Pornhub宣佈撤離法國市場之後，據一間VPN公司宣佈，於Porhub正式封鎖法國IP之後，註冊其VPN服務嘅人於短短30分鐘內暴增1000%。呢個結果似乎證明冇嘢阻得到法國人睇AV嘅決心！

圖片：Grok

其實Pornhub撤出法國嘅背景，就同近年佢封鎖多個美國州份使用者一樣，都係基於新實施嘅青少年保護法案。據《RFI》報導，法國於今個月7日正式實行新嘅「年齡驗證法」，規定如Pornhub等成人內容平台必須使用具備雙重匿名功能（即係網站唔會知道用家個人資料，驗證系統又唔會知用家驗證完睇過咩）嘅年齡驗證系統，先可以於法國境內繼續營運。

而Pornhub對於類似法規嘅回應一直都係「由網站進行嘅年齡嘅驗證防止唔到年輕人接觸成人內容」（因為可以拎阿爸張身份證）、「亦令用家個人資料有洩漏風險」（因為要將資料交予未必有能力保護資料嘅網站或第三方）。而佢哋嘅實際回應方法亦好簡單，就係撤出有相關法規嘅市場。所以佢哋亦於6月4日封鎖所有法國IP存取Pornhub網站。

唔夠一日之後，Proton VPN就於官方X上發文，表示自從Pornhub於當日下午5點撤出法國之後，其新用家註冊於30分鐘內暴升1000%換言之即使喺「平日下午放工時段」呢個大部份人都唔會睇AV嘅時間，依然有大量法國人為咗上Pornhub而去申請VPN。帖文亦表示，呢個上升幅度，比起早前美國宣佈禁用TikTok時（490%）更強，證明AV比起TikTok廢片更能激起大眾嘅行動力。

其實類似嘅新聞於Pornhub過去撤出、封鎖其他國家或美國部份州時亦有出現過。某程度上亦真係證明Pornhub否定年齡驗證法嘅說法有啲根據——狗上瓦坑有條路，真係阻佢唔到！