隨住硬件上能夠改進嘅嘢越黎越少，近年各個手機品牌都主力發展手機嘅AI功能，甚至已經有唔少人係因為要用、或者想用AI而決定換機。但如果你係睇中Apple去年宣佈、號稱能夠「更個人化」嘅新Siri而換機的話，相信你就要失望啦。事關近日宣佈新Siri或者要到「來年」先可以登場，更有報導指出新Siri開發進度未如理想，可能要由頭黎過，最快2027年先見街。

據《Daring Fireball》報導，Apple上星期五發佈公告，指除咗去年嘅更新之外，Apple一直開發緊「更個人化、更了解你嘅情況、能夠於App內甚至跨App進行操作」嘅新Siri，但「呢樣嘢比我哋想像中要更多時間」，所以「預期明年先會推出」。

值得一提嘅係，以上呢個「更個人化」嘅新Siri，其於早於2024年6月嘅WWDC後就已經有提到，所以並唔係啱啱開始整嘅「全新功能」。而去年嘅消息係指相關功能會於今年（2025年）內推出，所以Apple近日嘅新公告，其實就係婉轉地講「延期呀」。

圖片：Apple

而據著名《Bloomberg》記者Mark Gurman近日報導，新Siri嘅開發進度嚴重落後。目前嘅Siri背後有兩個模組，一個就係沿用以前嘅Siri，只能處理簡單指令，另一個就係近年新加嘅Apple Intelligence模組，而要做到真正嘅AI功能，其實係需要將二者融為一體。但Mark Gurman就估計要到iOS 19，Apple先會推出內部名稱叫「LLM Siri」嘅統一模組，如果要做到「自然對話式」嘅使用，更可能要等到2027年嘅iOS 20。

資料來源：Daring Fireball、Mashable