對於電玩界新聞有一定了解嘅讀者，應該會知道Playstation於遊戲開發上過得並不順心——淨係睇號稱用咗4億美金開發嘅《星鳴特攻》，結果上市不足兩個禮拜就被鬧到關閉伺服器、4億美金尤如倒錢落海就可見一斑。而近日前SIE Worldwide Studios（現稱Playstation Studios）總裁吉田修平Sony及Playstation，而非常順理成章咁接受多個媒體訪問，回顧過去於Sony及Playstation內嘅所見所聞，當中有啲回答，或者能夠令大家更了解Playstation近年嘅發展內幕。

吉田修平

吉田修平回顧Sony生涯時表示，當初佢大學畢業就加入Sony，並被安排於企業策略組為當時嘅公司總裁「大賀典雄」收集Sony旗下不同部門嘅新商機資料。而佢有個同事，當時就負責為緊與任天堂合作嘅開發「超任」嘅部門，而又因為呢個同事唔打機、吉田修平卻係個機迷，所以就會不停喺側邊畀意見，亦造就多年後「Playstation之父」久夛良木健打算開發Playstation時搵佢入隊，成為Sony Computer Entertainment（SCE，後來改稱Sony Interactive Entertainment，SIE）嘅初始成員之一。

到2008年時，吉田修平晉身SCE旗下負責管理Playstation自家以及第三方遊戲開發商嘅「SCE Worldwide Studios」總裁。直到2018年「惡名昭彰」嘅Jim Ryan上任，吉田修平離開改咗名嘅「SIE Worldwide Studios」，轉為參與照顧獨立廠商嘅特別計劃，並一直工作到今年1月離職。

Jim Ryan

Hermen Hulst

圖片：Wiki Commons

而於《Venture Beat》嘅訪問中，吉田修平先係提到自己照顧獨立遊戲廠商嘅成果，但當被記者提到「你轉去負責較小嘅廠商時」，吉田修平就回應：「『轉去』？其實我冇得揀。當Jim Ryan叫我去獨立遊戲團隊時，我只有『做』或『離職』兩個選擇。」縱然佢之後再次強調自己為Playstation上嘅獨立遊戲作出貢獻而自豪、未來亦會繼續與部份廠商合作，但仍然有當初被逼走嘅感覺。

有趣嘅係，吉田修平接受另一媒體《Kinda Funny》嘅訪問時，就提到Sony近年打算開發服務型遊戲嘅做法。佢指出於PS2及PS3年代主導開發過《Killzone》等FPS遊戲，但最終被《Call of Duty》一家獨大，佢就知道服務型遊戲係「贏家獨贏」。而打算用單一平台去成為贏家本身就係一個劣勢，更惶論Playstation玩家亦可以玩《Call of Duty》，所以佢當時會將更多預算撥向開發非服務型遊戲。同時佢亦指出佢離開SIE Worldwide Studios後，接任者Hermen Hulst與Jim Ryan係將大量資源於服務型遊戲之上，並認為佢哋係知道當中嘅風險但仍然願意嘗試。

但佢亦講明，如果佢仲係Hermen Hulst嘅位置「我應該會嘗試抵抗呢個方向——呢個可能都係佢哋調走我嘅原因之一」。

另一邊廂，Jim Ryan任內另一飽受批評嘅決定，就係關閉SIE Worldwide Studios旗下、曾開發過《捉馬騮》、《注達與巨象》等知名遊戲嘅SIE Japan Studio及之下嘅一眾日本工作室。而吉田修平接受《Sacred Symbols+》Podcast訪問時就提到，日本工作室關閉其實係市場嘅變化所致。佢指出除咗《GT》系列之外，SIE Japan Studios嘅其他遊戲都未能達到3A大作級別，只能算係2A；所以當廠商嘅資源集中於開發3A大作、成本更低獨立遊戲又能夠填補市場空缺時，唔上唔下嘅2A遊戲就冇咩生存空間。即使開發者有好嘅構想，亦會因為拎唔到足夠嘅資源無法真正開發。

資料來源：Venture Beat、Kinda Funny、Sacred Symbols+