社交媒體最後一片淨土失守！主打以文字交流嘅社交平台「Threads」，隨住用戶人數愈嚟愈多，Meta終於忍唔住宣布引入廣告，並將於美國及日本地區率先試行。

據Meta數據顯示，Threads目前每月活躍用戶高達3億人，當中有四分之三用戶至少有關注一個商業帳號。為咗「加深用戶同鍾意嘅品牌連結」（講白啲即係賺錢），Threads負責人Adam Mosseri日前喺Threads上宣布，Meta正為某些品牌在美國及日本地區進行小範圍廣告測試，並會密切關注測試效果，然後再決定會否擴大推廣範圍，目標係希望啲廣告能夠同原生內容一樣有趣。

Meta在公告中指出，Threads廣告初期會以圖片形式出現，並標示出「Sponsored」以代表為廣告貼文。Meta會根據用戶在Threads及Instagram嘅活動，提供相關廣告。而用戶亦會可以透過帳戶中心自訂廣告設定，選擇跳過、隱藏或舉報不喜歡嘅廣告。