市場研究公司DFC Intelligence 近日公佈有關遊戲主機市場嘅年度報告及預報，當中除咗指出整個遊戲持續增長之外，亦指業界已經走出疫情所帶來嘅陰霾。不過報告亦同時估計，目前「三國鼎立」嘅主機市場好可能於未來數年間發生變化，特別係Sony及Microsoft好可能只能兩者活其一。

據DFC Intelligence 嘅報告，隨住明年《GTA 6》，以及任天堂嘅新主機「Switch 2」推出，整個遊樂市場有望創下歷史性嘅增長。而去到2027年，全球「玩家」數量更有可能到達40億，即係成個地球有一半人都打機。

但個餅越黎越大，並唔代表所有都能分一杯羹。報告估計，任天堂率先於明年推出新世代主機「Switch 2」能夠搶佔先機，再加上Switch嘅獨特玩法與定位，能夠避免與其他兩廠直接競爭，所以任天堂將會成為大贏家。報告估計去到2028年，亦即Sony及Microsoft理應啱啱推出新世代主機之時，Switch 2已經賣出約6000萬台。

圖片：DFC Intelligence 

話就話成個餅越黎越大，但當大部份都被任天堂拎走後，餘下嘅空間就不足其餘兩家一齊生存。報告估計到2028年時，「非任天堂」主機銷售額不足4000萬台，而當中嘅絕大部份都會歸於Sony或Microsoft其中一方，而另一方只會分到數百萬台嘅份額——作為對比，目前Xbox SeriesX/S賣出約3000萬台，已經係算「差」。報告指出目前難以估計Sony及Microsoft之間邊個會贏，但就指出Sony擁有忠實Fans及強大IP嘅優勢，而Microsoft近年透過不停收購，有望成為最大開發商。

資料來源：Videogameschronicle