如果大家對於現實中嘅機械人發展有啲研究，相信都會聽過Boston Dynamics呢間公司。Boston Dynamics過去曾發佈旗下兩足機械人「Atlas」完成跳舞、打空翻等高難度動作嘅影片，展示出Atlas嘅超強活動能力。但其實Atlas之所以做得出呢啲動作，全靠工程師預先輸入活動指令，換言之過去嘅Atlas其實仲係個「遙控機械人」。不過Boston Dynamics近日就宣佈重大技術突破，表示Atlas已經能夠擺脫人類控制，自主完成搬運小型物件等任務。

Boston Dynamics於昨日（30日）發佈新YouTube影片，從中可見新型Atlas從一個貨架上抽出原本打橫放嘅小引擎蓋，然後移動幾步將引擎蓋打直攝入另一個貨架之中。據影片介紹，Atlas係靠配備嘅多個感應器，加上機械學習（Machine Learning）系統，於不受外界操控嘅情況下自主完成影片中嘅動作。而且Atlas仲可以自行修正動作，就例如影片中段Atlas因為對錯位而未能將引擎蓋攝入貨架時，「嚇親」之餘亦識得收手、重新測量位置並修改動作以完成任務。

Boston Dynamic指出，新Atlas能夠自動偵測外部環境（例如啲貨架）以及應對動作錯誤（例如攝唔入個引擎蓋，又或摔倒）。實際上則更涉及視像偵測、身體平衡、手臂及手指力度控制等多種運算，而且以上所有都係靠Atlas自己（及雲端伺服器）完成，無需人類插手。雖然目前只係技術示範，距離能夠投入民用應該有相當距離，但已經令人非常期待。