社交媒體已經成為現代人日常生活中不可或缺嘅事物，唔少人係將社交媒體當係日記（甚至係「時記」）咁用，諗到啲咩就Post啲咩。但頻繁發文除咗可能煩親朋友，又有可能令自己對社群媒體產生依賴，甚至可能會暴露太多個人資訊。所以近日就出現一個堪稱「單機版社交媒體」嘅新App，為大家提供一個私人、安全、但仍然「有Like」嘅發文空間。

呢個名叫「Palmsy」嘅iOS App，嚴格上唔係一個「社群媒體」，其實係一個「個人記事本」App黎。App入面嘅佈局、用法都同X（Twitter）或Threads等文字向社交媒體十分類似，當然玩家亦可以為帖文加入照片，甚至可以分享外部連結，但你Post嘅內容都只會存放於你部電話之內，唔會進入任何網站或伺服器，亦唔會有其他人見到，所以私隱性大大增加。

Palmsy之所以咁設計，除咗係為習慣將社群媒體當日記，但又想增加私隱性嘅用家，提供一個另類嘅記事本選擇之外，亦為打算（暫時）遠離社群媒體嘅人提供一個「頂癮」嘅空間。

你可能會問：「唔係喎，人哋Post Social Meda就係要有人Like嘛！依家Post完得我自己睇到有咩用啫？」咁你又唔使擔心，因為Palmsy內建「假Like」功能，於發文時你就可以選擇想要幾多個Like、啲Like幾時開始出現，設定好後Palmsy就會自動用你嘅聯絡人名單整一堆「假Like」過你，滿足你嘅「呃Like」願望。

另外創作者「Pat Nakajima」相當有幽默感，Palmsy上嘅指示、FAQ用字都頗為「搶口」。例如FAQ中問：「個App究竟有咩目的？」，佢嘅回答就係「喺個聯絡人名單到，搵返啲你唔再需要嘅聯絡人出黎剷咗佢？」

資料來源：Palmsy on App Store