智能手機已經成為現代人不可或決嘅生活工具，由3歲到80歲可能都過住機不離手嘅日子。不過近日經濟合作暨發展組織（OECD）公佈最新一次國際學生能力評估計劃（PISA）成績，就發現2022年全球15歲學生嘅數學、閱讀及科學成績都創下自2003年以來嘅新低。而有傳媒就引述相關數字，指出智能手機嘅出現，好可能係近代學生「越來越蠢」嘅原因之一。

圖片：PISA

話說OECD每自2000年，每三年就會對全球多個國家嘅15歲學生進行評估，而最新一次評估則因為疫情影響而延後一年於2022年進行，並於2023年11月發表報告。當中新加坡於數學、閱讀及科學成績都位居全球第一，澳門數學成績為全球第二、閱讀成績全球第七、科學成績全球第三，全部排名都比香港高（數學第四、閱讀第十一、科學第七）。

2018年相比，81個OECD國家嘅15歲學生數學平均分為480分，比起2018年嘅496分大跌16分，而閱讀能力亦由493分跌到482分。科學成績雖然只從493分輕微下跌至491分，但三項分數均創下歷史新低。

報告指出2018至2022年嘅成績下跌，好可能係同過去幾年疫情打亂學生學習有關。但報告同樣指出數學成績於2003至2009間均維持500分以上，閱讀成績亦於2009年達到502分，但往後就一直下跌。

OECD嘅新聞稿表示科技發展對近年學生成績有重大影響。適當、而且係協助學習嘅電子裝置的確有助提升學生成績，但同時即使控制住學生及學校嘅社會經濟能力差別，每日使用不多一個小時電子裝置嘅學生，平均數學得分依然比每日用五至七小時嘅學生高49分。調查中有45%學生表示手機不在身邊會感到焦慮，有65%表示曾於數學堂上被手機分心。甚至只係因為身邊嘅同學用手機而被分心（佔總人數30%），都可以令學生嘅數學成績跌15分，約抵消咗3/4年嘅上堂成效。亦令OECD於報告嘅十項提議中，提出要減少因使用電子裝置而造成的分心。

資料來源：PISA