Onkyo過去曾與多套動漫聯乘，出過數唔到咁多款真無線藍芽耳機。而近日佢哋又有新聯乘推出，不過今次就唔係同動漫合作，而係同遊戲廠商SEGA合作，並以SEGA旗下兩款遊戲主機MegaDrive以及Dreamcast為主題推出真無線藍芽耳機，明顯將目標放喺一眾經歷過當年SEGA皇朝嘅中佬身上——即係你同我呀！

今次聯乘，同樣係用Onkyo嘅CP-TWS01A真無線藍芽耳機 (過往N次聯乘幾乎全部都係用呢款)，不過最大賣點當然係外觀。例如MegaDrive版本用上黑色，左右耳松上會有「MD」標誌以及「16-Bit」字樣；而Dreamcast版本就用上白色，左右耳機上嘅係Dreamcast手掣按鈕佈局。兩款嘅充電盒亦還原主機樣貌，而且耳機啟動聲效都會跟返主機嘅啟動聲效，Dreamcast版額外多配對成功等五款聲效。

呢兩款SEGA聯乘耳機已於Onkyo官網有得賣，售價同為15,500Yen (約HK850)。另外同系列仲有無線充電板、小型塑膠立板以及T恤，均於Onkyo官網有售。

資料來源：Onkyo