唔知大家有冇同感，但隨住智能手機、社交平台嘅發展，近年人與人之間嘅信任似乎已經越黎越低，而中國手機生產商小米，就可能會令大家嘅互相降到新低。因為據中國傳媒報導，小米近日成功申請「眼球測謊技術」專利，未來或會推出有測謊功能嘅手機。淨係幻想下會發生咩事都已經好得人驚。

據中國科技傳媒ITHome報導，小米移動軟件公司於3月8日成功申請一項有關「測謊方法、裝置、移動終端及存儲介質」嘅專利。而據文件描述，該技術係利用手機上嘅遠攝 (Telephoto) 鏡頭對準被測試者嘅面部，獲取其面部圖像再分析其瞳孔活動。假若瞳孔活動符合某啲預設條件，就會「確定」被測者講緊大話。

文件仲話，該技術「在移動終端上就可以實現簡捷、有效的測謊功能，可以提升用戶使用移動終端的趣味性，進而提升用戶體驗」。

圖片：ITHome

某程度上，眼球活動的確能夠透露一個人有冇講大話。例如有研究指出，一個人嘗試搜尋記憶時，會不自覺地向左上方望；而如果係嘗試虛構一個答案，就會望向右邊。所以一個人回答問題時係向左望，就可能係講緊真話。但理論還理論，實際運用時係咪百份百準確係一回事，小米個技術係咪完全反映現實及理論又係另一回事。但或者不久嘅將來，大家嘅另一半就會拎住個小米電話黎問你「琴晚去咗邊到」啦。

資料來源：ITHome