先旨聲明，呢篇文入面嘅「加密硬幣」並唔係時下流行嘅「加密貨幣 (Crpytocurrency)」。卻說早前澳洲國防情報局為咗慶祝成立75週年，所以就發行咗一款限量五萬枚嘅紀念硬幣，而且仲喺上面加咗4層越黎越難嘅密碼，成功破解後就能得出一句「正向訊息」，以此挑戰國民嘅破解密碼能力。不過一名當地14歲少年，只係用咗一個鐘多啲就破解哂四層密碼，結果連局長都話想請佢入國防情報局做嘢。

澳洲國防情報局推出嘅呢杖「加密硬幣」於當地9月1日上午8時45分正式推出，與此同時當局亦於官方網站上放出表格，供認為自己破解出密碼嘅國民提交答案。你或者會以為一個國家級情報機關整嘅四層密碼，應該要花好一段時間先會被破解，但澳洲國防情報局長Rachel Noble上週於一個公開演說中透露，表格公開後一個鐘多啲，就已經有一個14歲少年提交正確答案，「實在係難以置信，你想唔想像做佢阿媽會係點？」而佢亦提到當局目前聯絡緊呢名14歲少年，「我哋好希望可以快啲見到佢，然後請佢黎做嘢。」

圖片：《Imitation Game》via IMDB

據局長指出，硬幣上嘅四層密碼係越黎越難，一開始只係用紙筆就大概可以破解，但到最後一層就大概需要電腦先可以破解，可見該名14歲少年嘅能力之高。不過局長亦提到，硬幣上其實係有之前冇講過嘅第五層密碼，至今都仲未有人能夠破解。

資料來源：abc.net.au