{ SKIP }
文:MenClub 魏文青  
POSTED ON 07 Jun 2022

Apple於昨日舉行一年一度WWDC發佈會,雖然發佈會係針對開發者而設,但如你我嘅一舨人亦能夠從中得知Apple產品未來嘅新功能!就等我哋為大家總結一下發佈會嘅五大要點啦!

1.iOS 

鎖機畫面能進一步個人化,可以設多個桌布、又可以改個鐘嘅字體、風格,亦可以加入Widget。同時不同桌布可以連結不同嘅專注模式,一轉就連其他Apps嘅專注模式設定都轉埋。同時桌布會顯示球賽比分、Uber行程等「Live Activities」,另外通知亦會改由下方彈出黎。

香港基本冇人用嘅iMessage就加入修改、收回已發送訊息嘅功能,語言輸入Dictation功能變成可以一邊聽寫一邊打字,方便用家修改內容,同時支援語入輸入emoji。傳送相片時更加入即時褪地功能,系統可以自動裁剪出相片中嘅主要物件。

相片加入「Shared Library」,可以選擇一堆相分享畀其他人一齊睇,影相時亦可以直接Up上Shared Library,獲得權限嘅所有人都可以一齊睇到。同時可以透過GPS連結身在附近嘅朋友,大家影嘅相可以分享去同一個Shared Library,一大班人旅行時分享照片。

加入Safety Check,可以一鍵停止分享GPS位置、重設所有密碼等,專門針對有變態另一半嘅受害者。

2. WatchOS

加入四款新錶面。

體能訓練App有「自訂體能訓練」,可以自行決定訓練、休息時間,以及需要嘅步速、心率等。另外跑步數據加入步幅、觸地時間等新數據。

加入「Medication」藥物追縱,可以輸入你每日要依嘅藥物、補充劑,然後設定時間表,隻錶就會定時定候提你食藥。亦可以於「健康」中查看藥物資訊。

3. M2晶片

5nm製程。4個高效能核心加4個高效率核心,再加最多十核GPU。支援最多24GB LPDDR5記憶體,100GB/S記憶體頻寬。Apple話M2嘅CPU效能比M1高18%、GPU效能高35%。另外新嘅媒體解碼亦可以支援8K H.264與HEVC、ProRess等編碼。

4. 新Macbook Air

搭配M2晶片,一改過往楔型設計,改成大致上四四方方嘅造型,尤其個Mon嘅部份同部iPad Pro非常相似;採用無風扇設計,所以鍵盤位置都非常薄,運行時亦非常靜。1.24kg重、機身厚11.3mm,MagSafe充電回歸,亦有3.5mm高阻抗耳機插孔。另外有金、銀、灰、深藍四隻色。13.6吋Liquid Retina Display,亮度最高為500尼特,比上代高25%,上方中間M字額位置就有1080p鏡頭。

官方宣稱有18小時續航力力,另外有個自帶雙USB-C插口嘅火牛,亦可以選擇67w火牛快速充電,30分鐘充到50%。售價HK$9,499起。

另外同場仲公佈咗搭配M2晶片嘅13吋Macbook Pro,不過外型方面就冇改變。係因為換咗CPU所有快咗、續航力長咗。售價HK$9,999起。

5. macOS Ventura

加入Stage Manager功能,會自動幫你將冇用緊嘅視窗、程式,分好類全部搬哂去左邊,用緊嘅就留喺中間,想切換時直接撳左邊啲視窗就得,撳一撳空白位置就回到桌面。Spotlight搜尋功能提升,同時iPhone嘅Spotlight亦會搬咗去手機主畫面下方。

Safari加入Shared Tap Group,可以將一堆分頁直接分享畀其他人,可以睇到其他人睇緊邊個分頁,大家亦可以新增分頁。

加入Passkey功能黎取代密碼。簡單而言就係透過生物認證為每個帳戶創造獨一無二嘅密碼,實際使用時就係 透過FaceID/TouchID登入,減少大家密碼洩漏嘅風險。同時Passkey屬於Fido Alliance之一,Google與Microsoft等都係成員。

自Blue Origin及Virgin Galactic於過去兩年分別成功載人上太空後,「商業太空旅行」就由小說情節,成為現實中可行嘅體驗不過,當然係只限有錢人體驗啦。而睇黎有錢人已經唔滿足於「飛上去望下個地球就落返黎」,而係 ...
tech
【太空】真 ‧ 離地餐廳 400萬上太空 望住地球食米芝蓮
28 Mar 2024
若然消息屬實,iPhone 16 Pro機身側邊將加入一個全新按鍵「Capture button」,大小與電源鍵差唔多,能方便用戶拍攝及錄影。
tech
【科技】疑似iPhone 16 Pro保護殼曝光!機身側邊加入全新「拍攝」按鍵?
27 Mar 2024