家務分工向來係夫妻生活一大挑戰，亦係最容易嘈交嘅原因。如果有隻機械人可以幫手拖地洗碗你話幾好呢！最近Dyson就自爆公司其實已祕密研發多年，嚟緊會聘請更多工程師幫手，各位再等下啦，Dyson幫緊你、幫緊你...

據外媒《The Verge》報導，以吸塵機、風筒及風扇產品聞名嘅Dyson，最近喺費城舉辦嘅IEEE機械人與自動化國際會議(ICRA 2022)上，透露公司喺過去20年一直祕密研發家務機械人，有望2030年正式面世。從宣傳片可見，目前Dyson嘅機械手臂已經能夠移放碗碟等易碎物、執起玩具作分類收納，甚至可以幫梳化吸塵，並具備感測器、相機鏡頭、熱成像儀等裝置感知家中環境。

為加快研發進度，目前Dyson正在招聘250位嚟自電腦視覺、機械學習、感應器以及機械電子領域嘅工程師，並預計未來5年再招聘700名機械人工程師。