對唔少返寫字樓嘅打工仔而言，Email唔記得加附件、Send錯電郵地址、打錯字、睇漏Email之類嘅小錯誤基本上係日常嘅一部份，但有時呢啲小錯誤就可能會造成非常嚴重嘅後果。例如Telegram早前就差啲因為睇漏Email而被巴西法院禁用。

巴西乃係全球最多人用Telegram嘅國家之一，其中一個原因係總統Jair Bolsonaro利用Telegram與支持者溝通 (Jair Bolsonaro亦係Telegram上最多訂閱者嘅政治人物)。而巴西最高法院法官 (亦係Jair Bolsonaro政敵) Alexandre de Moraes近日就希望限制Telegram上嘅假消息，所以發出司法命令，要求Telegram凍結一批散佈假消息嘅帳戶，點知Telegram竟然完全冇反應，於是巴西法院於上週五宣佈禁止國民於10月總統選擇前使用Telegram，如果使用VPN等方法強行使用，最高將面臨10萬巴西利里奧，即約2萬美金嘅罰款。

去到呢個時候Telegram方面先如夢初醒，創辦人兼CEO Pavel Durov即刻衝出黎回應，話一切都係誤會！原來2月時Telegram就已經遵照巴西法院嘅命令，移除過某啲內容，當時Telegram亦向巴西法院建議，如果將來有類似嘅要求，麻煩Send去某個專門信箱，等我方便啲睇。但唔知係巴西法院冇收到呢個回覆，定係佢哋唔Care，反正佢哋依然將最近呢次要求Send去Telegram嘅通用郵箱，結果Telegram方面就睇漏咗呢個Email，所以就冇應機。

而喺經過Telegram一輪解釋，以及承諾會移除Jair Bolsonaro陣營發放嘅假消息、標記含有假消息嘅帖文後，巴西最高法院就撤銷對Telegram嘅禁令。