我相信任何一個成長於千禧年代嘅男仔，都一定非常熟悉電腦嘅資料夾系統，因為要識咗佢你先可以將啲AV收埋喺「D Drive」入面嘅「我的文件」入面嘅「生肖運程」入面嘅「龍年」入面嘅「右滑鼠」入面嘅「新增資料夾」之中而唔被老豆老母發現。但據多位外國大學教授指，Z世代 (即千禧年左右出世) 原來係唔識用電腦嘅資料夾系統。

圖片：Pixabay、Unsplash

去年九月時，外國媒體《Verge》就報導過，多間大學嘅老師、教授們不約而同地發現學生對於「資料夾系統」毫無頭緒，最多見嘅就係讀理工科 (STEM) 嘅同學做完啲Project唔知Save咗去邊，Save咗又唔知點搵返出黎。據估計，Z世代之所以唔識用「資料夾」，其中一個原因係佢哋現實中已經好少整理紙張文件，所以缺乏「某份文件喺某個櫃桶中嘅某個文件夾入面」嘅概念，自然就唔識用基於同一理念而產生嘅文件夾系統。

另一個原因，就係因為現代嘅電腦、電話都有容易使用嘅「搜尋功能」 ，對於從小就「搜尋」嘅Z世代，電腦更似係一個乜鬼都有、只要輸入關鍵字就會搵到想要嘅嘢嘅大籃，而非一個整齊而且有層次嘅文件櫃。

圖片：Pixabay

作為一般用家，唔識用資料夾系統實在就冇咩問題，但作為工程師，好多時都需要直接輸入文件路徑，令程式能夠使用某個文件，缺乏資料夾系統概念就代表班學生讀書冇問題、智商冇問題，但就係用唔好啲系統。

但計我話，搞到班學生咁嘅最大元兇，一定係ThisAV同Pornhub。想當年我為咗收埋啲辛辛苦苦用56K上網Down返黎嘅珍藏，連點整隱藏資料夾都學埋，依家啲人用個無痕模式就得，自然就唔使學啦！

資料來源：Verge