隨住無反相機發展越見成熟，過往深受專業攝影師及發燒友青睞嘅單反相機 (DSLR) 無可避免地進入產品生涯末期，被淘汰就只係時間問題。而Canon社長御手洗富士夫近日就表示，品牌將於數年內停止開發旗艦級單反，亦確認去年推出嘅EOS-1D X Mark 3將係系列嘅最後一部。

御手洗富士夫接受日本《讀賣新聞》訪問時指，「無反相機及DSLR市場將一體化」、「市場需求正加速向無反相機靠攏，我哋亦會相應地將人員移向該方向」換言之集中資源關發無反相機，並於「數年內」完全停止開發及生產DSLR。而佢亦確認，EOS-1D X Mark 3將係品牌最後一部旗艦級單反，其銷售生涯完結之後就唔會再出同類同級機種。

於日本市場嘅無反相機銷售額，於2018年就已經超越DSLR 

圖片：讀賣新聞

EOS-1D X Mark 3

圖片：Canon

御手洗富士夫特別提到，隨住無反相機技術成熟，就連專業攝影師都開始選擇。無反相機因為機內冇反光鏡，影相時冇「喀嚓」聲嘅特性，亦能用於「近距離拍攝高爾夫球比賽」等場合，用途比DSLR更廣泛。未來亦將發佈更高性能嘅無反相機。

但佢亦表示，由於國外對DSLR相機嘅需求依然強勁，所以短時間內都會繼續閞發及生產中低階DSLR。換言之目前距離DSLR完全退出市場，仲有些少時間。

資料來源：讀賣新聞