平時睇飲食節目，即使見到啲主持人食到津津有味，甚至高呼「好好味呀！」，身為觀眾始終都係得個睇字。不過，最近日本明治大學就發明咗部新電視，大家只要伸條脷去舐個螢幕就可以品嚐到食物嘅風味！

據外媒《Reuters》報導，日本明治大學教授宮下芳明聯同30幾位學生，共同研發出一部名為「Taste the TV（TTTV）」嘅電視，機內配備10個唔同風味嘅罐，能夠調製出特定食物嘅味道，再由高壓噴嘴會將調配好嘅液體噴喺一塊膠膜傳送到螢幕上方，用家只要伸脷去舐個Mon即可品嚐，結合埋螢幕播放緊嘅畫面，帶畀用家視覺味覺雙重享受！

其中一位女學生就向記者親自示範，對住部電視表示希望品嚐朱古力味道，隨後部機就將調配好嘅液體噴灑喺螢幕，女學生舐完之後，就形容味道有啲似「朱古力牛奶」或「朱古力醬」。

（圖片截自：REUTERS/Kim Kyung-Hoon）

之不過呢部電視目前只係原型階段，宮下芳明透露假如正式推出，每部商用版成本大約10萬日圓（約$6,830港幣），預計TTTV將來會應用喺侍酒師及廚師遙距教學課程、試味或猜謎遊戲，而且佢仲打算製作一個類似音樂串流平台嘅系統，等用戶可以下載世界各地唔同嘅味道。