今年Facebook改名為Meta宣布大力投入元宇宙（Metaverse）技術開發，最近CEO Mark Zuckberg就向大家展示一款研究多年嘅「觸覺手套」，聲稱能令配戴者喺虛擬世界入面獲得真實觸感。

雖然近期各大科技巨頭都話要開發元宇宙，又講到最終目標好似《Ready Player One（挑戰者1號）》或《The Matrix（22世紀殺人網絡）》真實版咁，大家可以喺個虛擬世界入面娛樂、社交、返工等等，但目前較為普及嘅AR/VR裝置，其實頂多都係笠個眼罩/頭盔進入虛擬世界，並唔可以真係「摸」到入面嘅嘢。

對此，近日Mark Zuckerberg就向大家展示一款由Meta Reality Labs團隊開發嘅「觸覺手套」，手套上佈滿黑色嘅迷你氣囊以及震動摩打，當拎起虛擬世界嘅物件嗰陣，氣囊就會充氣限制配戴者指關節屈曲，從而模擬真實觸感。從示範影片亦可以見到測試員戴上手套作出握手、玩層層疊、拋波等動作，似乎可以廣泛應用喺唔同場景。不過手套目前仍處於早期開發階段，而且好大嚿非常唔方便，相信距離量產仲有一段漫長嘅時間。