全球能源危機愈演愈烈，受供應短缺影響，各國都出現大規模限電情況，工廠被迫停工，市民生活大受影響。為解決能源問題，最近一班SpaceX前員工成立新創公司Radiant，研發一款攜帶式核反應爐，計劃為偏遠地區、災區或地下室提供電力。

新創公司Radiant由一班SpaceX前員工創立，其中唔少人都負責過SpaceX火星殖民計劃能源研究，研究期間佢哋發現小型核反應爐最具發展潛力，於是另起爐灶成立Radiant，並已獲得120萬美金天使投資。

據了解，呢款攜帶式核反應爐最大特點在於使用「先進核燃料」，比傳統核燃料能夠承受更高溫度，不易熔化，並用上氦氣冷卻系統取代傳統水冷，進一步降低反應爐出現腐蝕、沸騰以及污染風險。除此之外，反應爐體積細小便於運送，只要搭配專用運輸容器，就可以快速運送到各地。

Radiant亦表示，每個反應爐可以提供超過1MW電力，足以應付1千個家庭8年用電量，就算用喺工業或軍事設施都大約用到4-8年。計劃目前處於原型測試階段，應該有排先可以推出市面，不過就算成功研發到出嚟，我諗都要面臨一系列法規及社會輿論挑戰。你知啦，應該冇人想屋企附近有個核反應爐，即使佢係「安全」同埋非常迷你。

資料來源：newatlas、radiantnuclear