{ SKIP }
文:MenClub 魏文青  
POSTED ON 16 Sep 2021

我細個嘅時候,我阿媽每日都會掃地同拖地,而黎到2021年,相信唔少人屋企都已經用吸塵取代,仲好可能唔係日日吸添。咁你又覺得個地下夠唔夠乾淨?定或係其實好污糟只係你見唔到?Dyson最新推出嘅Dyson V12 Detect Slim吸塵機就係潔癖者嘅福音、懶人嘅噩耗,因為佢可以「照」到你個地有幾多塵呀!

Detect Slim最大賣點,係在於佢有個「智能雷射輕量軟絨毛滾筒吸頭」,其特別之處在於內置一個細小嘅綠色雷射,能照亮吸頭前方大約兩尺左右嘅範圍,而且因為與地面形成1.5度夾角,如果地面有塵 、頭髮之類嘅塵垢,就會令綠光產生折射,變得非常顯眼,咁你可以睇清楚邊到有塵就隊埋去,吸完又可以欣賞一塵不染嘅美好。

喺發佈會之上,Dyson亦有安排實物示範,綠色雷射的確係能夠令塵埃無所遁形,地板深淺色亦唔太影響其功效。不過用於光滑表面 (即係木地板、瓷磚之類)嘅表現就最好,如果係地氈之類本身就已經有凹凸嘅表面就會睇得冇咁清——不過產品專家話呢個吸頭本身都唔預大家用黎吸地氈。

除咗個雷射之外,Detect Slim內部亦有個「壓電式聲學感應器」,實際上係咩原理大家應該唔想知,反正就係部吸塵機知道你吸緊幾多塵、啲塵又有幾大粒,然後自己決定吸力;吸塵機個頂仲有LCD顯示屏,會有個報告話你知吸咗幾多10微米、60微米、180微米或500微米嘅塵——越黎越覺得呢部嘢係為潔癖者而設。

除咗雷射吸頭,Detect Slim仲有個「全新防纏結螺旋吸頭」,簡單黎講就即係吸頭入面個滾筒係呈錐形,然後又有螺旋坑紋,咁當你吸啲又長又幼嘅例如係頭髮、寵物毛呀之類嘅嘢時,佢就會自己順住個滾筒又粗去幼再吸入個集塵筒到。

Detect Slim系列總共有三個組合,最平嘅Fluffy賣HK$5,180,已經有哂上述所有功能同埋低處清潔轉接頭、LED 隙縫吸頭等;加多四舊水去到HK$5,580就可買Total Clean,即係多個頑固污垢塵掃;再加四舊,HK$5,980就係可以換埋電嘅Absolute Extra啦。

資料來源:Dyson

每當提起VR裝置,唔少人都會諗起打機或睇戲等娛樂用途,相信點都估唔到原來可以同醫療扯上關係。最近生物科技公司Luminopia就宣佈旗下一款VR裝置,成功獲得美國食品藥物管理局(FDA)批准,用於治療兒童弱視問題。 ...
tech
【科技】美國FDA批准生物科技公司透過VR裝置治療兒童弱視
21 Oct 2021
美國前總統特朗普宣佈,成立新公司「Trump Media and Technology Corp (TMTG)」,並於明年第一季推出其自家社交平台「TRUTH Social」,以對抗「Big Tech」嘅科技霸權。 圖片:Wikipedia 自從特朗普於年初 ...
tech
【科技】對抗Big Tech霸權 特朗普宣佈成立新社交媒體「TRUTH Social」
21 Oct 2021