隨住多方消息指Apple將於9月推出iPhone 13系列，相關傳聞就一直都冇停過，可惜不外乎係鏡頭勁啲、螢幕瀏海縮小、電池容量多啲、同埋有新配色等冇咩「新意」嘅升級。不過，日前著名Apple分析師郭明錤表示，由於Apple睇好衛星通訊趨勢，預計iPhone 13系列將支援低軌道（LEO）衛星通訊，就算用戶唔喺4G/5G訊號覆蓋範圍，都可以透過衛星打電話或Send訊息。

（圖片截自：天風國際微信）

郭明錤於報告指出，縱觀Apple發展歷史，升級產品網絡規格能夠為使用者帶嚟創新體驗，例如iPhone嘅成功就同3G/4G網絡技術革命密不可分。由於Apple目前正面臨低軌道衛星通訊以及5G網絡技術革命，若然能夠早著先機融合兩樣網絡技術，將會提升日後所推出嘅AR/MR頭戴式顯示器、Apple Car及物聯網（IoT）配件使用體驗。

（圖片截自：macrumors）

郭明錤估計iPhone 13將採用支援低軌衛星通訊嘅客製化高通X60基帶晶片，其他廠商想推出支援衛星通訊嘅機款，最快都要等到2022年採用到時嘅高通X65基帶晶片。另外，佢又認為雖然SpaceX嘅Starlink衛星網絡服務發展迅速，但考慮到高通同衛星通訊公司Globalstar合作已久，相信Apple最終好大可能會同Globalstar合作，令用戶可以透過原本嘅網絡營運商獲得Globalstar衛星服務，無需額外申請。