隨住3D生物打印技術日漸成熟，人造肉已經變得相當普遍，近年各大餐飲巨頭亦相繼將人造肉/植物肉引入餐單。最近日本大阪大學科學家發表一項新研究，表示團隊成功研發出世界首款3D打印和牛，而且有同真和牛一樣嘅大理石花紋。

（圖片截自：GatesNotes）

養牛業一直被外界批評碳排放量極高，係導致溫室效應嘅一大因素，更有研究指出如果將全世界嘅牛組成一個國家，每年碳排放量差唔多等於一個美國，從而驅使科學家研究相對環保嘅人造牛肉。

（圖片來源：eurekalert）

同大家現時見到嘅人造牛肉/牛扒唔一樣，今次日本科學家製作嘅係「和牛」。研究團隊首先從和牛身上採集兩種唔同嘅幹細胞，再喺實驗室將幹細胞培育成肌肉纖維、脂肪及血管等，然後將三者按照真實和牛肉結構比例疊埋一齊，最後用類似製作金太郎糖嘅方法切出嚟。研究員松崎典彌表示，呢種技術能夠透過調整脂肪肌肉比例製作出唔同口味嘅「和牛」，以滿足唔同客戶需要，同時希望藉此減低傳統養牛業對環境嘅影響。不過佢哋就冇話幾時會正式推出市面同賣幾錢。