Nikon喺今日終於推出全新APS-C無反相機「Z fc」，今次主打懷舊復古設計，外觀類似自家經典菲林相機Nikon FM2，採用機械式轉盤調教ISO、快門速度、曝光補償等多項參數，並提供多達七種機身配色，似乎想主打年輕及女性用家。唔知Nikon可唔可以靠呢部新機砌低Fujifilm搶返唔少輕便無反市場，殺出一條血路呢！

Nikon Z fc規格同2019年底推出嘅Nikon Z50相近，同埋搭配2,090萬像素CMOS、採用Z-mount鏡頭接口，支援USB Type-C充電及數據傳輸，同樣有一個觸控式反MON，不過Z fc個MON就可以成個翻出嚟，唔似得M50咁只可以向下翻，大大提升自拍及安裝配件自由度。

Nikon Z fc套裝可以選擇搭配「NIKKOR Z DX 16-50MM F/3.5-6.3 VR」標準變焦鏡頭，又或者搭配全新「NIKKOR Z 28mm f/2.8 (SE) 」定焦鏡頭。全新28mm鏡頭傳承NIKKOR經典鏡頭設計，鏡頭控制環印有滾花飾紋，就連字體都忠實還原返菲林時代特色，配埋落部主打復古嘅Z fc，顯得毫冇違和感。

除咗黑色之外，另外亦有六種顏色可以選擇（仲多花款過iPhone），預計7月下旬喺美國同日本率先開賣，但具體售價同發售日期就仍然有待官方公布，估計會同Z50當初嘅定價差唔多，有興趣嘅朋友請密切留意。

資料來源：Nikon