隨著科技發展一日千里，太空旅行嘅夢想變得不再遙不可及。最近美國加洲有間太空科技公司「Orbital Assembly Corporation」（簡稱OAC）打算喺2025年建造世上首間近地軌道（距離地球500-550公里）太空酒店，將配備餐廳、劇院、水療中心以及可容納400人嘅客房，並預計最早喺2027年投入營運。

太空酒店採用環形設計，透過旋轉產生與月球表面相若嘅人造重力（即地球重力六分之一），每90分鐘環繞地球一周。酒店外圍設有24個長20米、寬12米嘅吊艙，分別用作客房、戲院、餐廳等各種起居飲食娛樂設施，甚至可能會出租畀NASA做太空研究。

目前OAC並無透露太空酒店建設成本，亦無透露過夜一晚要幾錢。只係表示多得Space X嘅Falcon 9同Starship可重複使用運載火箭，相信建造成本將會愈嚟愈平。

一直以嚟，將材料發射到太空嘅成本約為每公斤8,000美金，但隨著Space X Falcon 9火箭出現後，將發射成本降至每公斤2,000美金。Space X預測，當Starship成功研發後，將進一步將發射成本降至每公斤只需幾百蚊美金。