近年電動車熱潮有增無減，除咗電動車龍頭大佬Telas不停設新廠增產以外，Apple 又話要出電動車「Apple Car」，多間傳統車廠又開始投入研發電動車，就連美國政府都話要換曬所有政府用車做電動車，睇嚟電動車成為未來大勢所趨。

Oliver Blume

據外媒Bloomberg報導，日前保時捷 CEO Oliver Blume 接受德國傳媒 Bild am Sonntag 訪問表示，未來5年將會投資150億歐元研發電動車，預計2025年賣出嘅車入面，有一半將會係電動車，並喺2030年之前更會將電動車比例提高到80%，得返經典跑車 911 系列保留採用燃油引擎。

一講到保時捷，大部份人第一時間諗起都係 911 系列。

被問到係咪想同 Tesla 鬥， Oliver Blume 就好客氣咁話 Elon Musk 係一位偉人，同時又係一位偉大嘅商人，Tesla 正採取各種策略，並增加產量，所以先不停喺世界各地設廠。而保時捷就唔係行呢條路線，將會保持現有造車原則同特獨性，實現客人夢想。當初開發全電動跑車 Taycan 嗰陣，都唔係以 Tesla 做基準，而係希望整部有 911 駕駛體驗嘅電動車。

保時捷全電動跑車 Taycan 4S。

Oliver Blume 同時表示，為咗達到全球減碳目標，保時捷正研究點樣將零碳排放嘅甲醇轉化成合成燃料，希望藉此成為合成燃燒界先驅，所以先留低 911系列。