Sony推出完新機「Sony Alpha 1」唔夠一日，Fujifilm緊隨其後喺尋晚開發布會出新相機。今次Fujifilm共推出兩部相機，中片幅相機「Fujifilm GFX 100S」及可換鏡旁軸相機「Fujifilm X-E4」。今次Fujifilm兩部新機照顧曬唔同用家，普通用家可以選擇買X-E4當做隨身機，而專業用家就可以考慮GFX 100S，有辣有唔辣，任君選擇。

今次發布會主角當然係中片幅相機GFX 100S，具有1億像素中片幅CMOS，身機連電池只有900g，比起上代GFX 100足足輕咗500g。GFX 100S雖然「的骰」，但都具備5軸防震，減低手震對相片影響，而且支援[email protected]錄影。今次GFX 100S強加咗對焦功能，臉孔及眼部追蹤更精準，喺-5.5EV暗光環境下都可以實現最快0.16秒對焦速度。

如果GFX100S 太專業導向，唔係靠相影搵食只係想買部相機仔玩下，XE-4可能啱你心水。大家無睇錯，呢部係Fuji嚟，唔係Leica，近年Fuji啲機真係愈嚟愈似Leica，你黐返個紅色Leica Logo遮住X-E4三個字都應該呃到下人，靚到可以買部返嚟掛頸做裝飾。

X-E4非常「輕身」只有365g，重唔過部手機好多，如果配上短身嘅「餅乾」鏡身，放入褲袋完全唔係問題。比起上代，X-E4應光器升級成同X-Pro 3及X-T4一樣嘅2,610像素 「X-Trans 4」CMOS ，能夠實現最快0.02秒對焦及-7EV暗部對焦。

鐘意用Fuji嘅人好多都係貪佢色靚，以及相機內置模擬菲林模式，影完就可以Send返落手機直接Post IG打卡呃like，唔使返屋企用電腦執餐死。今次X-E4比上代增加多3款模擬菲林模式，總共有18款畀你選擇，總有一款啱你。

透過模擬菲林模式影嘅相會特別有「味道」。（圖片：Fujifilm）

售價方面，GFX100機身售價為$6,000美元（約$46,500港幣），XE-4機身售價為$850美元（約$6,590港幣），預計三月發售。