美國總統就職典禮如常開始，但因為早前國會衝擊事件就令保安大幅加強，就連Airbnb早前都宣佈會審視今個星期於華盛頓嘅所有訂房，以制止「仇恨組織及暴力活動有關人士」Book房 (最後就宣佈取消所有華盛頓訂房) ——但大家有冇發現一個問題，就係Airbnb究竟點知Book房個人係「仇恨組織及暴力活動有關人士」呢？答案係，Airbnb專門有一Team人去監察訂房者嘅社交網站。

據《The Information》報導，Airbnb嘅「誠信及安全部」中有大約6名員，其工作就係用假嘅Facebook、Twitter甚至論壇戶口，去追查訂房者於社交網站及論壇上嘅發文、讚好、分享，假如發現訂房者發文與「危險組織」有關，就會直接Ban咗佢個Airbnb用戶。《The Information》特別提到，因為好多Airbnb用家都係使用Facebook登入，令到Airbnb要追查用戶嘅社交更為容易。

圖片：Wikipedia

據報，Airbnb早於2017年美國維珍尼亞州「團結右翼集會」之後就開始實施呢個政策，3年內Ban咗至少160個用戶，其中60個更加係Airbnb主動核對一個新納粹網站流出嘅用戶電郵後刪除。而Airbnb發言人回應《Engadget》查詢時就話「如果有訊號指一個仇恨組織成員用緊Airbnb，我哋會追查並作出相應行動。資料可能來自Airbnb社群嘅其他用戶、社交網站或新聞報導。」