英國政府早前宣佈，明年一月起禁止通訊商購買華為5G設備後，昨日又宣佈明年9月起禁止安裝任何華為5G設備，為2027年前全面淘汰華為生產嘅5G通訊設備作準備。

圖片：https://thenationalpulse.com/

據《Financial Times》報導，英國政府於7月宣佈明年1月禁買華為設備後，有通訊商大手買入大量華為5G設備，期望未來慢慢安裝，但新法例之下，通訊商將不能於明年9月後繼續安裝華為5G設備，換言之佢哋只有大半年時間將手頭上所有華為5G設備全數安裝——基本上就冇可能做到。亦即係變相逼通訊商提早「轉會」非華為設備。

但於明年9月前完成安裝嘅設備將不受影響。

據《BBC》報導，假若新嘅通訊安全法案獲得英國國會通過，違規電訊商將被重罰，罰款可以係營業額嘅10%或每日超過10萬磅。BBC引述英國數位化、文化、媒體和體育大臣Oliver Dowden指，新法案將會賦予政府「分辨及禁止會對國家安全構成威脅嘅通訊設備」，「我們亦推出一個新嘅策略，避免依賴少數通訊設備生產商去建構一個順暢而安全嘅網絡」。新法案下，英國政府亦會投資2.5億英磅，成立「國家通訊實驗室 (National Telecoms Lab)」，以推動英國本土嘅通訊設備研發。