去太空冒險甚至到達另一個星球，可能係唔少人嘅願望，尤其依家成個地球都好似冇個地方好住，如果有機會移民太空好似都係個唔錯嘅選擇。而根據NASA最新發表嘅報告，淨係太陽系所在嘅銀河系，保守估計都有3億個「宜居行星」，想太空移民嘅話大把選擇呀！

圖片：NASA

首先要知道所謂「宜居行星」嘅定義，其實相當簡單，主要係指該星球為主要石質、表面環境能夠(理論上)存在液態水份就已經符合，當然背後都仲要計恆星嘅大小溫度、行星與恆星距離、大氣層成份之類。而NASA使用克卜勒太空望遠鏡於2018年退役前收集到嘅資料、淨係去搵銀河系中年齡與大細都同太陽差唔多、而又有至少一粒行星圍繞嘅恆星星系，再估計當中7%星系有宜居行星，都得出銀河系中有多達3億個宜居行星，而且最近嘅一個只存在於太陽系20光年之外，算係非常近架啦。

值得一提嘅係，NASA話上面個「7%機率」係非常、非常保守嘅計法，樂觀嘅話個機率係75%，換言之「3億」呢個數字都可能唔係真正答案。

圖片：NASA

當然，「表面可能有水嘅石質星球」只係一個非常基礎嘅宜居星球標準，但當你有幾億個機會時，冇理由一個適合人類居住嘅星球都撞唔到架？如果搵到又去到，移民外星好似好過移民外國喎。